Iran-ah nawrh huaihawt chhunzawm zel

Iran ramah an ram economy tlahniam leh thil man sang zel avanga sorkar laka lungawi lohna lantir chhunzawm zel a la ni. Nilaini khan nawrh huaihawt leh security force-te innawr buai lehin, silai hmehpuah a ni bawk.

Semi-official Fars news agency chuan chhim thlang lam, Lordegan khuaa mi ṭhenkhat, silai kengtne police pahnih an kap hlum tih a sawi. Hmun dangah pawh security force-ten pungkhawmte hnawh darh nan silai an hmehpuah bakah tear gas an hmang a, nuarte hian lungin security force-te hi an bei let bawk a ni.

US-based Human Rights Activist News Agency (HRANA) chuan province 31-a khawpui 111-ah nawrh hi huaihawt a ni tawh tih a sawi a, innawrbuaina thlengah nuar zinga mi 34 leh security force member pali an thi tawh. Mi 2,200 vel man a ni tawh bawk.

Iran-a nawrh huaihawt hi nikum December 28-a Tehran khawpui dawrkaiten an ram pawisa hlutna tlahniam zel avanga lungawi loa an ṭan a ni a, a hnuah zirlaiten zawmin khawpui hrang hrangah a darh zui a ni. Nawrh huaihawtte hian ram hotu ber, Supreme Leader, Ayatollah Ali Khamenei laka an lungawi lohna thute pawh an upui zui a ni.

Khamenei chuan nawrh huaihawtte chu thuneituten inbakna neihpui an tum tih a sawi a, hemi rual hian buaina leh tharum thawhna thlente chu an chungthu ngaihtuah a ni ang, a ti. President Masoud Pezeshkian pawhin boruak muanawm tak hnuaia nawrh huaihawtte chu beih let an ni dawn lo a; mahse ralthuam leh hmanraw dang chelek a, police station leh sipai hmun dang beitute erawh buaina siamtu tia thliar hran an ni dawn tih a sawi a, heng mite chu thubuai siamsakin hremna pawh pek an ni dawn tih a sawi.