China-ah underground kohhran hruaitute man

China ramah underground Protestant kohhran, Early Rain Covenant Church hruaitu pakua chu Thawhlehni khan man an ni a, an zinga panga chu Nilaini khan chhuahin mi dang chu an la hreng chhunzawm.

Police-ten underground church te dap hna an thawhnaah Chengdu-a Early Rain Covenant Church office leh kohhran hruaitute in an dap a, hruaitute hi manin man an nihna chhan tak erawh sawichian a ni lo. Wenzhou-a Yanang Church building pawh an tichhe bawk a ni.

China sorkar chuan kum 2018 khan an ramah Kristian mtd 44 vel an awm niin a tarlang. Mahse, underground kohhran tam tak a awm a, heng mite hi chhiar tel an ni em tih erawh hriat a ni lo. Rorellai, Communist Party chuan sorkarin a pawmpui pastor-te kaihhruai leh enkawl kohhranah chauh tel turin Kristiante pawh a lo nawr ṭhin. Sorkarin a pawmpui loh kohhran hruaitute chu man an ni fo niin underground kohhrante chuan an sawi.

Early Rain Covenant Church hi kum 2008-a pastor Wang Yi leh a nupui Jiang Rong te an din a ni a, kum 2018 khan an biak-in dapin pastor-te nupa hi man an ni a,a hnuah an kohhran member 100 vel man a ni leh bawk. Nikum Ocotdber thla khan Zion Church hruiatu 30 te chu man a ni a, a dintu Ezra Jin chu tun thlengin a la tang. December-ah Yang Church member 100 vel man ni bawkin, an zinga 24 chu an la hreng niin Human Rights Watch chuan a tarlang.

Nikum khan thuneitute chuan kohhran hrang hrang hruaitute chu social media-a thu hril bakah naupang tana online activity buatsaih leh, sorkarin a pawmpui loh platform kaltlanga online hmanga sum tuak an lo khap tawh a ni.