Iran-a nawrh huaihawt vanga thi 500 an chuang tawh

Iran rama sorkar laka lungawi lohna lantira nawrh huaihawt chu chhunzawm zel a ni a, nawrh huaihawtte leh security force-te innawr buai vanga thi chu 500 an chuang tawh. Thi zingah hian nawrh huaihawt zinga mi 490 leh security force mi leh sa 48 an tel nia sawi a ni a, mi sing chuang man an ni bawk.

Mitthi leh man zat hi US-based rights group, HRANA tarlan a ni a; Iran sorkar chuan a zat hi a tichhuak lo thung. Kar liam ta Ningani aṭang khan internet tihtawp a nih avangin, thil thleng kimchang pawh hriatchian a har nia sawi a ni. Iran sorkar chuan an rama buaina chhuak mawhphurtuah US leh Israel a puh a, ram pahnihte chet dan duh loh leh demna lantirin ram pumah kawngzawh huaihawt turin mipui a sawm. Iran president Masoud Pezeshkian chuan TV-a interview a neihah Iran hmelmate chuan an ram tibuai turin firfiak an dah lut a, heng mite hian mosque te halin bank leh sorkar hmunte an bei a ni, a ti. Nawrh huaihawtnaa an naute leh fate tel tir lo turin mipui a chah bawk.

Iran rama nawrh huaihawt hi nikum December 28 aṭanga ṭan niin, a tirah chuan Tehran-ah thil man sang zel duh lohna leh an ram pawisa hlutna tlahniam avanga lungawi lohna lantir an ni. Mahse, nawrh huaihawt hi punlun zelin, a hnuah an ram sorkar leh hruaitute laka lungawi lohna lantir chhunzawmna atan an hmang a ni.

US president Donald Trump chuan Iran-a nawrh huaihawtte security force-ten an beih let chungchangah inrawlhah a lo vau tawh a, Pathianni khan Iran official te chuan inbiakna neihpui turin an bia niin a sawi a, 'Mahse, meeting neih hmain chet kan la hmasa zawk maithei,' a ti.