World Court-ah Myanmar tan Suu Kyi inlan dawn

Myanmar State Counsellor Aung San Suu Kyi chu Myan­mar-a Rohingya Muslim tam tak thata puh an nih chungchangah tunkar chhung hian Myanmar aiawhin The Hague-a Inter­national Court of Justice-ah a inlan dawn. 

ICJ-a Myanmar laka thu­buai thehluttu, ram 57 telna Oganisation of Islamic Co-operation aiawhin, Africa khaw­thlang lam ram, Gambia chuan ICJ hnenah hian Myanmar-a insuatna thleng mek titawp tura hma la turin a ngen dawn a ni. ICJ-ah hian Myanmar chungchang hi ni thum chhung ngaihtuah a ni ang.

Suu Kyi hian Myanmar legal team a ho dawn a, Netherlands-a UN court sang berah hian an ram aiawh hian a inlan dawn a ni. Hetih lai hian mi ṭhenkhat chuan legal team ho tura politican tirh hi an sawisel thung. Myanmar rama Rohingya Muslim-te chungchang hi vawiin aṭangin ngaihtuah ṭan a ni ang. 

Kum 2017-a Myanmar sipai­ten Rakhine state-a Rohingya-te beihpui an thlak avang khan Rohingya 740,000 vel chu Bangladesh ramah an tlanchhia tih UN investigator-te chuan an sawi. Ram hrang hrangten Myanmar sipaite chetdan an dem thu an sawi bawk. Hetihlai hian Myanmar chuan a sipaite chetdan hi a chhan thung a, border post beitu Rohingya helte chauh an bitum niin a sawi.