Donald Trump-a'n Israel ṭhian ṭha ber a ni tih a sawi

United States (US) president Donald Trump chuan US President ni tawh zingah amah anga ṭhian ṭha chu Israel in a la nei ngai lo tih a sawi. 

Hollywood, Florida-a American Israeli Council National Summit a hman­puinaah Trump chuan he thu hi sawiin, Ame­rican foreign policy tidang­lama Israel khawpui atana Jerusalem a pawm thu leh, Tel Aviv aṭanga Jerusalem-a US Emba­ssy a sawn tir dante a sawichhuak. 

Trump chuan a hmaa America President ni tawhte chuan embassy sawn hi lo tiam fo tawh mah se, an zingah tumahin tih tum tak takna an nei lo nia a ngaih thu a sawi. "Mahse kei chuan president dangte ang loin, ka thutiam chu ka tihlawhtling zel a ni," a ti. 

President office a luah hnuah Trump hian Middle East-a American policy chu a siam dang­lam nasa hle a, Israel thlawpna lam hawiin policy te hi a thlak a, hetihlai hian Palestinian lam sawisel erawh a tawk nasa hle thung. Jerusalem chu Israel khawpuia a pawmsak bakah, kum 1967 aṭanga Israel-in Syria rama Golan Heights bial a luahsakah pawh Israel chu thuneituah a pawmsak a ni. November thla khan Israel-in Pales­tian ram a luahsak, West Bank-a Juda mi awmte pawh dan ang taka awm­ah US sorkar chuan a ngaih tur thu a sawi. 

Trump hian a makpa, Jewish-American Jared Kushner chu Middle East-a remna leh muanna  a awm theihna tura US-in hma a laknaah mawhphurtuah a dah bawk. Jared Kushner hi sorkar inrelbawlna kawnga tawn hriat la nei lo a nih avangin mawhphurhna a pek hian sawisel pawh a hlawh hle a, mahse Trump chuan a makpa thlavang hi hauhin a ring tawk tih a sawi a, Jared Kushner-a'n Middle East-a remna a siampui thei lo a nih chuan, thil tih theih loh tihna a ni ang, a ti.