New Zealand tlang kangah mi panga thi
New Zealand rama White Island-a tlang kang vangin nimin khan mi panga an thi a, chin hriat lohin mi dang eng emaw zat an awm.
Tlang kang invawrh chhuahna hmunah hian a hma lawkin khualzin eng emaw zat an awm a, police-te chuan mi 23 an chhanchhuah thu an sawi. Thi zat hi an la punchhoh an rin thu sawiin, tlang kang invawrh chhuahna hmunah hian chhanchhuah hna thawk tur pawhin kal ngam a la ni rih lo tih an sawi bawk.
White Island hi Whakaari tia hriat a ni bawk a, New Zealand rama tlang kang thlen fona hmun a ni. GeoNet chuan he hmuna tlang kang invawrh chhuak zinga 70% chu tuipui hnuai aṭanga a invawrh chhuah ṭhin thu a tarlang. Hetichung hian he hmun hi khualzinte hmun tlawh duh ber zinga mi niin, tlang kang rawn invawrh chhuah ṭhinna hmunte en tur hian nitin khualzin eng emaw zat an kal ṭhin.
New Zealand prime minister Jacinda Ardern chuan he thil thlen lai hian White Island-ah hian New Zealand ram mi bakah, ramdangmi khualzin eng emaw zat an awm tih a sawi. Police-te chuan chhanchhuah hna thawk nghal mah se, vut sa vawrh chhuahte an la tlak nasat avangin a hmun hi an la thleng thei lo tih a sawi.