Khawvela PM naupang ber tur Sanna Marin

Finland transportation minister Sanna Marin, kum 34 mi chauh chu a party, Scoial Democratic Party (SDP) chuan Pathianni khan Finland Prime Minister atan an thlang. Marin hi khawvela Prime Minister ni thei naupang ber a ni dawn.  

Social Democratic party hi Finland-a party panga-ten ṭangrual sorkar an siama party lian ber a ni. Kar liam ta Thawhlehni khan Antti Rinne chu ṭangrual sorkara tel SDP thawhpui Centre Party-in PM atan an ring zo tawh lo tih an sawi avangin a bang a, a thlaktu tur hi Pathianni khan an thlang ta a ni. PM hlui Antti Rinne hi November thla khan, an rama 'postal service' chungchanga thil fel tawk lo awmah mawhphurtuah puh a ni. 

Social Democratic Party (SDP) council chuan PM thar thlang hian vote an la a, vote 61 awmah Marin hian vote 32 a hmu. "Mipuite rin kan hlawh leh theih nan nasa taka ram tan kan thawhrim a ngai dawn a ni. Ka kum leh ka nihnaah ka buai lo a, politics-a ka zuan luh chhan khan vawin hian hnehna chang turin min thlangtute hnenah rinna a siam a ni," tiin Marin chuan thlan tlin a nih chungchang leh ram tan a thawh­rim tur thu a sawi. 

Marin hi karlehah Prime Minister atan lakluh a ni dawn a, khawvela PM ni thei naupang ber tur a ni. Marin dawtah hian Oleksiy Honcharuk chu kum 35 mi niin Ukraine PM a ni mek. Anni dawtah hian Jacinda Ardern pawh kum 39 mi niin New Zealand PM a ni mek bawk a ni.