Sentut vangin Samoa-ah naupang 70 thi tawh

Samoa sorkar chuan an ramah sentut vangin naupang 70 an thih tawh thu leh, heng zinga 61-te chu naupang kum 4 hnuai lam an nih thu a tarlang.

Nimin zing thleng khan darkar 24 chhungin sentut natna vei mi 112 ziah luh belh a ni. Samoa ramah hian sentut natna a hluar zel avangin, ni hnih chhung rampumah emergency puan a ni. Naupang kum 19 hnuai lam chu puipunnaah kal phal a nih loh bakah, natna laka in venna vaccine la lo naupang kum 19 hnuai lam chu, damdawi-in leh a kaihhnawihah kal phal a ni lo bawk.

Rampum huapa sentut hri vei inziak lut tawhte chu mi 4,693 an ni a, chung zinga 229-te chu damdawi-in lama enkawl mek an ni. Naupang 16-te dinhmun ṭha lo zual a awm thu pawh tarlan a ni. Hrileng laka invenna vaccine hi kar hnih atan bak a thawh ṭhat loh thu pawh sawi a ni.

October thla khan ram mipui 30%-te hnenah vaccine pek a ni tawh a, natna hi tihrem a nih theih nan, rampum huapa vaccine lak runpun neih mek a ni. Tunah hian ram mipui 90% te chuan vaccine an lak  tawh thu thuneitute chuan an sawi.

Sentut natna hi nau­pang lamah a thawk tlang­pui a, a natna rawn lan­chhuah dan ṭhin chu, taksaah bawl a rawn insiam ṭhin a, khawsikte a thlen thei a, thluak a tih­chhiat theih bakah thihna hial a thlen thei a ni. Pacific tuipui bul hnaiha awm Tonga, Fiji leh American Samoa-ah te hian sentut natna hi a hluar hle nia sawi a ni. World Health Organization (WHO) chuan Samoa ram­ah hian nikum khan 'sentut vaccine' hi nausen 30% chiah in an lak thu a tarlang. Samoa rama sentut hluar chhan hi 'sentut vaccine' lak tlem vang a nih thu thuneitute chuan an sawi.