US leh Taiwan-in trade deal USD tld 250 hu ziak

United States leh Taiwan chuan Ningani khan insumdawn tawnna tura inremna, trade deal USD tld 250 hu an ziak. US chuan Taiwan bungrua a chawk luha chhiah lak tur pawh a titlem bawk.

Inremna an siam hmang hian Taiwan company-te chuan US-a tech industry - semiconductors, artificial intelligence applications leh energy ah USD tld 250 hu investment an ti dawn a ni. US president Donald Trump chuan Taiwan bungrua an chawk luha chhiah 20% lak tura a tih pawh inremna siam hnu hian 15% ah a tihniam.

U.S. Department of Commerce chuan Taiwan nena inremna an siam hian economy lama thawhdunna ṭha tak a siam dawn a, US-ah world class industrial park siamin, Taiwan-in an rama an thil siam chhuah a punna tur pawhin a pui dawn bawk a ni, a ti. Taiwan sorkar pawhin US-ah 'Taiwan model' an kalpui dawn tih sawiin, technology industry lamah pawh hma an sawn phah dawn bakah, US nena an inlaichinna pawh a nghetin a chak phah dawn bawk a ni, tiin a tarlang ve bawk.