Kum 25 hnuah EU leh Mercosur in trade deal ziak

European Union (EU) leh South American trade bloc, Southern Common Market, Mercosur tia sawite chuan insumdawn tawnna kawnga inremna siam tur kum 25 chhung inbiakna an neih hnuah, Inrinni liam ta khan inremna an ziak fel thei ta. Hei hi EU-in trade deal a ziah tawh zinga lian ber a la ni.

Inremna an siamah hian EU leh South America ramte inkara insumdawnna tihlenna bakah, chhiah tihhniamna turte duan tel a ni. European Parliament leh Mercosur member Argentina, Brazil, Paraguay leh Uruguay legislature-ten an pawmpui ve leh a ngai ang.

Paraguay khawpui, Asuncion-a inremna thuthlung an ziahah, EU hotu Ursula Von der Leyen chuan chhiah chungchang ringawt ni loin dik leh felfai taka insumdawn tawnna chu an thlang zawk a, hun rei tak tur thawhdunna neih chu an thlang tih a tarlang. Paraguay president, Santigao Pena pawhin inremna ziah a ni thei ta chu lawmawm a tih thu sawiin, hei hi international trade tana thil ṭha tur a nih thu a sawi ve bawk.

Hetih lai hian Mercosur nena insumawn tawnna tur inremna siam hi EU-a loneitute pawl leh environmental group-te chuan duh loin an lo dodal ve thung. Kar liam ta pawh khan Ireland-a loneitute dang tel chuan inremna siam duh loin nawrh an huaihawt a, Europe ram hruaitute chuan loneitute dinhmun leh ṭhatna tur an ngaihtuahpui lo niin an sawi. Mahse hruaitute chuan inremna siam hian hna thawh tur a siam belh dawn bakah, mipuite tan remchanna tam tak a siam thei dawn a ni, an ti.