Spain-a rel insuah mi 39 an thi

Spain chhim lama Anadulsia biala Córdoba khawpui bulah an ram huna Pathianni zan khan high speed train pahnih an insu a, mi 39 an thi a, hliam 173 an awm. Hliam zinga 24 te chu an dinhmun a ṭha lo hle nia sawi a ni.

Transport minister Oscar Puente chuan chetsualna thlenna hmun hi rel kawng siamṭhatah a ni tih sawiin, rel chesual zinga pakhat chu a thar a nih thu a sawi. Kawng ngil lai takah he chetsualna hi a thleng chu thil mak tak a nih thu a sawi bawk. Defence ministry chuan chetsual thlennaah hian emergency military unit aṭangin mi 40 bakah motor 15 tirh nghal a nih thu a tarlang.

Chetsualna thleng vang hian nimin khan Madrid leh Andalusia biala khawpui - Cordoba, Seville, Malaga leh Huelva inkara high-speed rel service pawh tihtawp lailawk a ni. Spain hi Europe-a high-speed rail network lian pathumna niin, khawpui lian hrang hrangah tlan tir a ni a, rel chak chi hi tlanna tur bik kawng hi km 3,000 chuanga thui a awm.

Prime minister Pedro Sanchez chuan chetsualna thlenga thi chhungte leh hliam tuarte a tawrhpui thu a sawi a, Spail lal King Felipe VI leh Queen Letizia te pawhin an tawrhpui thu an tarlang ve bawk.