Mozambique ramah tuilian vangin mi 100 chuang thi

Mozambique ramah kar liam taa ruahsur nasa avanga tuilian thlengah mi 100 chuang an thi tawh tih thuneituten an sawi.

South Africa, Mozambique leh Zimbabwe ramah kum tir lam aṭang khan ruah nasa takin a sur a, ruah hi a la sur chhunzawm dawn nia sawi a ni bawk. Mozambique chu tuilian tuar nasa ber niin, a bikin an ram laili leh chhim lamah province-ahte tui a lian nasa hle.

World Food Programme chuan Mozambique rama tuilian hian mi nuai hnih chuang a nghawng a, chenna in sang tel a chhiat bakah, mi tam tak chu an in aṭanga insawnchhuah ngaiin an awm bawk tih a tarlang. Tuilian tuarte hi sipai helicopter hmanga sawn chhuah an ni a, khualzin tangkhang pawh eng emaw zat an awm bawk.