Japan PM-in inthlan neih hun tur puang

Japan prime minister Sanae Takaichi chuan February 9-a Parliament lower house, House of Representative inthlan neih a nih tur thu leh, inthlan neih dawn vang hian Zirtawpniah parliament ṭhiah a nih tur thu a puang.

Thawhṭannia news coference a neihah PM Takaichi hian inthlan neih tur hi a puang a "Sanae Takaichi hi Prime Minister ni tur hian a tling em? Ram mipuiten thutlukna an siam ka duh a ni," a ti. January 23-a parliament ṭhiatin, January 27 aṭangin campaign ṭan a ni ang a, February 8-ah vote thlakin vote tla pawh chhiar nghal a ni ang, tiin a sawi. Member 456 awmna house MP te kum li term atan thlan an ni ṭhin.

Japan Iron Lady tia hriat lar, Takaichi hi Japan rama hmeichhe prime minister ni thei hmasa ber a ni a, nikum October thla khan PM atan ruat a ni. PM atana lak luh a nih tirh aṭangin, a cabinet chuan mipuiten duhthlanna an siamna inthlan an la hmachhawn lo tih chu rilruah a awm reng thu a sawi a ni. Hei vang hian mipuite vote hmangin, sorkar siam turin an thlawp em tih fiah a duh a ni.

Rorellai, Liberal Democratic Party (LDP) hian kum 1955 aṭang khan thuneihna an la chang chho a, House of Representatives term kal mekah hian seat 199 neiin party mala seat ngah ber a ni. A thawhpuite nen sorkarna an siam a ni. Mipui ngaihdan lakna hrang hrangah LDP larna hi a tlahniam tawh a, hetih lai hian Takaichi leh a kaihhruai sorkar thlawptu erawh an ṭha hle thung a, 60-80% velin an thlawp a ni. Hei vang hian inthlan buatsaih turah Takaichi hian LDP hi party mala sorkarna siam thei tura a chakpui theih beiseina pawh a awm.