Autralia-in silai khuahkhirhna khauh zawk siamna tur bill pawm

Autralia rama nikum December 14-a Bondi beach-a inkahna rapthlak tak thlenga mi 15 an thih hnuah, nimin khan an ram parliament lower house, House of Representatives chuan silai khuahkhirhna khauh zawk siamna tur bill a pawm.

Nimina House-a bill chungchanga vote laknaah, a thlawp lamah vote 96 tlain member 45 in an thlawp lo thung. Bill siamṭhatah hian ram pawn aṭanga silai lak luh dan khauh zawk siam a, silai licence dilte chungchangah pawh intelligence agency-ten an chanchin kimchang zawka chhuia an inhrilh theih dan turte pawh ruahman a ni. Sorkarin silai a lei let sakna, buyback scheme hmangin khuahkhirhna siamin a huam silaite chu lei let tum a ni dawn a, hei hian an rama silai register awm zat, maktaduai li pawh a tihtlem phah an beisei.

Home affairs minister Tony Burke chuan Australia lama silaia inpawngkahna thleng rapthlak ber nia sawi, kum 1996-a silai keng mi pakhatin Tasmania-a mi 35 a kahhlum chungchang sawi chhuakin, he thil thleng vang hian hetih laia sorkar pawhin khawvela silai khuahkhirhna dan khauh ber zinga mi chu a lo siam tawh a ni, a ti.

Parliament lower house-ah hian sorkar lai, Labor Party hian majority a nei a, eptu ṭangrual pawlin thlawp lo mah se awlsam takin bill pawh hi a tlang thei a ni. Senate ngaihtuah a ni leh dawn a, hetah hian Labor Party hian party dang thlawpna a mamawh tel tawh dawn thung a ni.