Japan PM hlui Shinzo Abe thattu dam chhung tang turin hrem

Japan court chuan nimin khan an ram prime minister hlui, Shinzo Abe kaphlumtu Tetsuya Yamagami chu dam chhung tang turin a hrem.

Kum 2022-a Shinzo Abe-a'n Nara khawpuia election rally a neih laiin Yamagami hian silaiin a kap a, Abe hi a hliam tuar loin a thi a ni. Japan rama silai hmanga pawikhawihna a thlen khat avangin a thiltih hian an ram pawh a ṭhawng hle. A pawikhawihna thlen chungchangah hian mipui ngaihdan hrang hrang a tam a, mi tam takin a chetdan rawng tak an dem laiin, ṭhenkhat chuan enkawl seilen a nih dan avanga hetiang hi thleng niin an ngai bawk.

Prosecutor-te chuan Yamagami hi a chetdan avang hian dam chhung lungin tan a phu tih an sawi a, hetih lai hian defence team lam chuan sakhuain an chhungkua a tihchhiat leh nghawng kalzel a ni, tiin hremna pek chungchangah ngaihnathiamna dilin, kum 20 aia tam lo tan tir turin an ngen ve thung. Yamagami nu hi Unification Church atchilhtu niin, an kohhran tana a inhman nasat avangin an chhungkuain sum lamah an tlakchhiat phah a ni. Yamagami hian Unification Church leh Abe inzawmna neih dante a hriat hnuah, Abe hi a haw hle a ni. Hei vang hian pawikhawihna pawh hi a thlen phah ta nia ngaih a ni. Yamagami nu hian an kohhran tan hian a pasal thi tawh life insurance bakah an chhungkaw thil neih eng emaw zat thawh a, a thil tawh hi yne mtd 100 man vel niin an sawi.

Unification Church hi South Korea-a din niin, kum1960 chhoah khan Japan ramah hian an lut a, an kohhran thil buatsahah Abe bakah Japan-a politician eng emaw zat an tel fo ṭhin. Mahse, kohhran mite chu an thlarau nun atan a ṭul tia thil man to tak tak kohhran tana leitir an ni ṭhin, hei bakah an inenkawl dan dangte pawhin sawisel a hlawh a, nikum March thla khan Tokyo court chuan kohhran pawl a nihna status chu a lo tihtawp sak tawh a ni.