Iran state TV-in nawrh huaihawtnaa thi zat a puang

Iran state TV chuan Nilaini khan an rama nawrh huaihawtnaa thi zat chu mi 3,117 an nih thu a puang a, hei hi official-a thi zat an puanchhuahna hmasa ber a ni. Hemi rual hian Foreign Minister chuan US vauna a tichhuak nghal bawk a, an ram beih a nih chuan an neih zawng zawng hmangin an bei let dawn tih a sawi.

State TV hian Interior Ministry leh Martys Foundation thuchhuah tarlangin, nikum December 28 aṭanga an rama nawrh huaihawtna thleng vanga thi zinga mi 2,427 chu civil mi leh security force mite an nih thu a sawi a, a bak mi dangte chungchang erawh a sawilang lo.

Hetih lai hian US-a hmunpui nei, Human Rights Activists News Agency chuan nawrh huaihawt leh security force-te innawr buaina thi hi a tlem berah 4,560 an tling niin a sawi thung. Iran sorkar hian buaina a chhuah hnuah an rama internet service a khuahkhirh zui avangin report kimchang tak a hriat theih loh a ni.

Tun ṭum nawrh huaihawt vanga thi hi kum tam tak chhunga Iran rama nawrh huaihawtna thlenga thi an tamna ber a ni. Buaina chhuakah hian Iran chuan US leh Israel chu mawhphurtuah a puh bawk. Interior Ministry chuan buaina siamtute chu firfiakte tia sawiin, silai an chelek niin a tarlang a, Martyrs Foundaqtion pawhin Israel nena inzawmna nei leh, US-in hmanrua hmanga a puih firfiakte man tuma chhui zui zel an ni dawn tih a sawi bawk.