Israel-in Rafah border-ah surveillance system hmang dawn

Israel chuan Egypt leh Gaza inkalpawhna, Rafah border crossing a hawng a nih pawhin ramri kaltlanga chetvelna thlithlai leh enfiahna turin surveillance system a hmang dawn.

Surveillance system hmang hian Rafah border crossing kaltlanga Gaza Strip-a luh tur leh chhuak turte pawh enfiah an ni dawn a, hei bakah computer leh electronic device dang pawh enfiah an ni zel dawn tih an tarlang. A inkalpawhna hmunah hian Israel Defence Force dah an ni dawn lo a; mahse, a bul hnaiah sipaite hi dahin checkpoin siam a ni dawn a, Gaza-a ralthuam tawlhluh tumte an lo veng dawn a ni.

Rafah crossing hi European Union Border Assistance Mission-a officer ten an enkawl dawn a, he mission hi ramri enfiahtu atana kum 2005 a din a ni. Palestinian Authority hnuaia intelligence service member-ten an pui bawk ang.

Gaza Strip-a Israel-Hamas indona a thlen hnuah Rafah ramri pawh hi khar zui a ni a, nikum khan Israel chuan Gaza Strip aṭanga chhuak duhte tan chauh hawn a rawt. Mahse, Egypt hian kawng khah chauha hawn hi an duh bik lo a, hei vang hian ramri hi khar zui a ni ta zel a ni.