Trump-a'n Board of Peace zawm tura Canada a sawmna sut

Gaza Strip buaina chinfel dan leh, a inrelbawl zui zel dan tur ngaihtuahtu atana US president Donald Trump-a'n a din, Board of Peace-a tel tura Canada a sawmna chu Ningani khan a sut leh.

President Trump hian a Truth Social-ah hemi chungchang hi tarlangin, Board of Peace chuan Canada a sawmna chu a sut leh a ni, a ti. Hei hi Davos-a World Economic Forum neih mekah Canada prime minsiter Mark Carney-a'n ram hausa leh thiltithei zawkten economy leh chhiah lak chungchang ralthuam ang maiin an hmang tia a sawisel vang nia ngaih a ni. Kar liam ta khan Carney office chuan board-a tel tura sawmna a dawn thu leh, pawm a tum thu a lo tarlang tawh a ni.

Davos-a Carney thusawi hian lawm a hlawh viau laiin, Trump erawh chuan a ngaimawh hle. Canada chu US vanga nung a ni tiin, Carney chu US laka lawm hle tur a ni, a ti. Hei hi ni danga thu a sawi leh hunah pawh hre reng turin a chah bawk.

Board of Peace zawm tur hian ram hrang hrang sawm an ni a, Argentina, Bahrain, Morocco, Pakistan leh Turkey bakah Us thawhpui ram zingah Britain, France leh Italy te chuan tunah rih chuan an zawm mai dawn lo tih an sawi.