NKorea official-in Donald Trump a vau
North Korea senior official Ri Su Yong chuan US president Donald Trump-a'n tunhnaia a thusawi leh a chetdan vangin a vau.
Workers' Party of Korea (WPK) Central Committee vice-chairman leh Political bureau ni bawk Ri Su Yong chuan tunhnaia Donald Trump thusawi chu a dawngsawngtu tan chuan thil ngaihmawhawm tak a nih thu sawiin, a chhungrilah erawh hlauhna nei nia an hriat thu a sawi.
"Trump hi huaisen takin a ṭawng a ni mai thei, mah se hei hi a pawm tur a ni a, a tuh chuan a rah pawh a seng tur a ni a, thil lian zawk hmachhawn a duh a nih loh chuan thil a sawi hmain a inngaihtuah chiang hmasa tur a ni," a ti.
Donald Trump hian Pathianni khan a twitter-ah Kim Jong Un chu smart hle mah se hloh tur erawh a ngah hle a ni, a nihna takah chuan inhmelmakna tur lam hawia a che zel a nih chuan engkim a hloh thei a ni, tiin a sawi a, hei hi NKorea lam hian an helh hle a ni.
NKorea hotupa Kim Jong Un hian US chu hun tiam chin siam sakin, kumin chhung ngei hian an ram pahnih pawm dun theih inremna an siam a nih loh chuan kawng dang an dap dawn tih a lo sawi tawh bawk. Trump chuan NKorea chungchangah hriat loh a la ngah hle tih a sawi tawh bawk.
NKorea missile enchhin kha rocket engine a ni : SK Defense Minister
Pathiannia North Korea-in Sohae Satellite Launching Station aṭanga missile enchhinna a neih kha, South Korea defense minister Jeong Kyeong-doo chuan rocket engine enchhinna a nih thu a sawi.
Jeong hian eng engine chiah nge a nih thu engmah sawi lang lo mah se, North Korea chu ralthuam lama a inlulingna leh ralmuan thlak loh taka a chet ṭhin chu titawp turin a ngen. North Academy of National Defense Science chuan missile enchhinna an neih kha, North Korea-in missile lama a tihdan phung a thlak danglamna a nih thu a tarlang ve thung.
Hmanni lawka NKorea-in missile a enchhin hi eng missile nge a ni tih leh chanchin kimchang tarlan a ni lo. Nikuma Pyongyang hmuna summit an neihnaah khan, North Korean leader Kim Jong Un leh South Korean President Moon Jae-in te chuan ram pahnih inthurualna leh thawhdunna atan, Sohae hmun aṭanga missile kapchhuak tawh rih lo turin an intiam a, chu chu Kim hian a bawhchhia niin thuthar thehdarhtute chuan an tarlang nasa hle.
NKorea hian US lakah a lungawi loh avangin nuclear hi a enchhin fo a, October thla tira Sweden khawpui Stockholm-a Pyongyang nuclear programme chungchanga ram pahnih palaite'n darkar kua zet inbiakna an neihah khan, US palaiten an beisei loh lam ngaihdan an vawrh avangin North Korea lam chuan inbiakna neih mek chu an lo titawp tawh bawk.