US palaiten Israel tlawh

US president Donald Trump-a palaite pahnih, Jared Kushner leh Steve Witkoff te chuan Inrinni khan Israel an thleng a, Gaza Strip hma lam hun tur chungchang Israel hruaitute an sawipui dawn.

Kushner leh Witkoff hian Israel prime minister Benjamin Netanyahu an hmu dawn a, Gaza Strip-a inkahhai puan chhunzawm a nih theihna tur leh, hun rei tak daih tur remna leh muanan siam a nih theihna tura hma lak dan turte an sawipui ang. US CENTCOM hotu Admiral Brad Cooper pawhin Inrinni vek khan Israel a tlawh bawk.

Kar liam ta khan Trump leh US official dangte chuan Davos-a World Economic Forum-ah Gaza din thar dan tura an hmathlir neihte an lo tarlang tawh a ni. Trump-a makpa, Jared Kushner chuan indona avanga Gaza infrastructure leh public service tihchhiatte din thar lehna turin investment, USD tld 25 tal tih a ngaih tur thu a sawi. UN leh World Bank pawhin Gaza din thar lehan tur hian USD tld 53 vel a ngaih tur thu an lo sawi tawh a, U.N. Trade and Development agency chuan USD tld 70 vel a ngaih dawn bakah, a din thar lehna tur hian kum tam tak hun a duh dawn niin a tarlang bawk a ni.

President Trump ruahmanna hnuaiah Israel leh Hamas te hian nikum October 10 aṭang khan Gaza Strip-ah inkahhai an puang a; a thawh hnihna hi tun thla tir lam khan kalpui leh a ni. Hetih lai hian inremna thuthlung bawhchhiaah an inpuh tawn reng thung. Hamas sorkar hnuaia Civil Defence Agncy chuan Inrinni khan drone hmanga Israel sipaiten an beihnaah Palestniani mi tleirawl pahnih an thi leh niin an sawi a, Israel chuan sipai awmna bul beih tumtu firfiak pahnihte an that niin an sawi ve thung.