Mexico-a soccer field-a inpawngkahna thlengah mi 11 thi

Mexico rama Guanajuato state-ah Pathianni khan soccoer field-ah silai keng mi pakhatin mi a pawng kah a, mi 11 an thi a, hliam 12 an awm.

Pawikhawihna thlenna hmun hi Salamanca khua niin, silai hmetpuaktu hi inkhelh zawh dawn hnaiah field-ah hian thlengin a silai a hmetpuak zui a ni. A hmunah mi 10 an thi a, hliam tuar damdawi-in panpui zinga pakhat chu a hnuah a thi ve leh bawk. Salamanca mayor Cesar Prieto chuan an khuaa pawikhawihna a thleng fo tih sawiin, pawikhawihna thleng ṭhin thunun a nih theihna atana hma la turin president Claudia Sheinbaum a ngen.

Guanajuato state prosecutor office chuan inkahna thleng chhui chian mek a nih thu leh, khawpuiah security thuam chakna tura sorkar laipui hotute nena an thawh ho thu an tarlang.

Mexico ramah hian inthahna a thleng hluar hle a, nikum chhung khan Guanjauato hi inthahna thlen tamna a ni. Tualchhunga gang, Santa Rosa de Lima leh Jalisco New Generation Cartel te inkarah chak zawk nih inchuha inbeihna a thleng fo a ni. Hetih lai hian nikum, kum 2025 kha kum 2016 hnua kum khat chhunga inthahna a thlen tlem ber ṭum nia sawi a ni a, mi nuai khat zelah mi 17.5 thah anga chhut an ni.