Khawvel Lawrkhawm

Peru-ah magnitude 5.5-a nain lir a nghing

Peru chhimchhak lamah Ningani khan magnitude 5.5-a nain lir a nghing a, in leh kawng a chhia a, thi erawh an awm hriat a ni lo.

Lir nghin ṭanna hi Lampa khaw aṭanga km 58 vela hla, lei hnuai km 38-a thuk niin Geophysical Institute of Peru (IGP) chuan a sawi. Mi 15,000 chenna Lampa khuaah hian in pariat a chim a, Parathia district chhunga in 40 a chhe bawk. Heng hmuna chengte hi hmun him lamah hruaichhuah an ni.

Second 30 chhung lir nghing hi hriat a ni a, Andes tlangdunga awm Puno khuaah pawh an hre thei a ni. Lampa leh Puno khua hi Bolivia ramria Lake Titicaca bula awm an ni. Peru hi Pacific Basin-a lirnghing leh tlang kang thlen duhna bial, ëRing of Fireí an tihah a awm. Kum khatah lirnghing hi ṭum 200 vel a thleng ṭhin a, mahse a tam zawk chu hriat tham loh an ni.

Trump-an Secretary of Defence atan James Mattis a thlang

US President-elect Donald Trump chuan Secretary of Defence atan Marine General hlui James Mattis a thlang.

Trump chuan Mattis a thlan thu hi Cincinnati rally-ah a sawi a, mahse karleh Thawh-
ṭanni-ah puanchhuah a ni dawn chauh tih a sawi. Trump leh Mattis-te hi November 19 khan New Jersey-ah an lo inkawm tawh a ni. US danah chuan sipai officer-te hi an chawlh
aṭanga kum sarih chhung chu defence secretary-a an ṭan khap an ni a, mahse Mattis hi kum sarih a la chawlh tlin loh avangin Congress-in he hna chelh tur hian phalna a pek a ngai dawn a ni.

Khawpui lian pali-ah diesel motor khap dawn

Paris, Mexico City, Madrid leh Athens khaw mayor-te chuan khawpui chhung boruak tih thianghlimna tura hmalak nan kum 2025 aṭangin diesel hmang motor hman an khap dawn tih an sawi.

Heng khawpui pali-ah hian diesel hmang car leh truck-te khap a ni ang a, heng motor neite hian an motor an thlakna turin incentive pek an nih bakah, mipuite hnenah ke-a kal leh thirsakawr hman uar tura an fuih tur thu an sawi. Mexico-a C40 meeting neihah mayor pali-ah hian diesel motor hman khap hi an rel a ni.