Thailand lal atan Crown Prince Vajiralongkorn puang

Thailand Crown Prince Maha Vajiralongkorn chu Ningani khan Thailand lal atan puan a ni.

Kum 64 mi, Prince Vajiralongkorn hi a pa, King Bhumibol Adulyadej thih aṭanga ni 50 hnuah lal atan hian puan a ni ta a ni. Lal atana puan a nih lai hi an ram pumah mipuite en theih turin TV-ah live-a tihchhuah a ni.

Thailand Parliament, National Legislative Assembly (NLA) chuan hun eng emaw chen an sawiho hnuah Prince Vajiralongkorn chu lal atan hian an sawm a, ani hian a pa thi ta leh an ram mipuite aiawhin an sawmna chu a pawm thu a sawi.

Prince Vajiralongkorn hi King Rama X a ni dawn a, Chakri dynasty hnuaia lal 10-na a ni. A hming hi ìHis Majesty King Maha Vajiralongkorn Bodindradebayavarangkunî tih a ni tawh ang.

Lal atana lakluh ni mah se, King Vajiralongkorn hi nakkuma a pa ruang halral a nih hma chuan lallukhum khumtir a la ni lo ang.

Kum 1952, July 28-a piang, King Vajiralongkorn hi King Bhumibol Adulyadej leh Queen Sirikit-te fa pali zinga a upa dawttu leh an fapa neihchhun a ni. Kum 20 a nih kum, kum 1972 khan a pa chuan amah thlaktu tur, crown prince atan a ruat a ni.

United Kingdom leh Australia ramah te lehkha a zir a, Autria-ah kum eng emaw zat military training a nei bawk. Qualified helicopter leh fighter pilot a ni a, Thailand army, navy leh air force-ah rank sang tak a chelh bawk.