SKorea first lady hlui thamna dawn vangin thla 20 tang turin hrem

South Korea president aṭanga paihthlak tak, Yoon Suk Yeol-a nupui, Kim Keon Hee chu sawi hlawh tak, Unification Church aṭanga thamna dawnga puhna thubuaiah thiam loh chantir a ni a, thla 20 tang turin nimin khan court-in a hrem.

Kum 52 mi, Kim Keon Hee hi a thubuai dang, kum 2022 president inthlan neih dawna stock price tichingpen leh political broker hnen aṭanga thil dawnga puhnaah erawh a fihlim thung. A pasal, president hlui Yoon hi kum 2024 kumtawpa an rama sipai thuneihna sang, martial law a puan chungchangah a thuneihna dik lo taka hmanga puhin kum nga tang tura hrem a ni tawh bawk. South Korea chanchinah an president hlui leh a nupui ṭum khatna thiam loh chantir an nih vawi khatna a ni.

Seoul Central District Court-a judge Woo In-sung chuan Kim hian a mimal hlawkna turin a dinhmun chu a hmang sual a ni, a ti. A thubuai buaipui tura special counsel team ruat chuan Kim hian April–July 2022 inkar khan Unification Church aṭang hian thilpek, won mtd 80 hu a dawng a, heng zingah hian Graff lunghlu ṭhi leh Chanel handbag eng emaw zat a tel tih an sawi. A thilpek dawn avang hian Unification Church hian sum leh politics lam thilah sorkar lam aṭangin duhsakna an dawng let ve bawk.

Counsel team chuan Kim hi a thubuai pathumah kum 15 tang tur leh, won tld 2 chawi tir turin an phut. Mahse, a thubuai pakhatah chauh thiam loh chantir a nih bakah, judge chuan Kim hi thamna hi pe tura a dil a ni lo a, hei bakah a hma lam pawhin thil dik lo tihna record engmah a nei lo tiin, a hremna a tinep a ni.