PTI-in Imran Khan enkawlna ṭha pe thuai turin phut

Pakistan prime minister hlui, jail-a tang mek Imran Khan chu a hriselna a ṭha lo hle a, a mit lamah harsatna tawk mekin enkawlna ṭha pek thuai a nih loh chuan a mit a del mai a hlauhawm niin a party, Pakistan Tehreek-e-Insaf (PTI) chuan an sawi.

PTI chuan Imran Khan chungchang hi X-ah an post a, media report aṭangin a mit dinglam a ṭha lo hle a, enkawl thuai a nih loh chuan a ṭha lo zual zel dawn a ni, an ti. Khan chu enkawl a duhna hospital-ah ngei sawn a, a chhungte leh a ṭhianṭha hnaivai te pawh hmuh phalsak turin an phut bawk.

Damdawi lam thiamten Khan dinhmun an sawi chungin, jail thuneitute chuan Adiala jail chhunga enkawl turin anti lui niin PTI chuan an sawi. A mimal doctor a hmuh hnuhnun ber pawh kum 2024 October thla daih tawh a ni tiin, hemi hnuah medical examination a neih pawh phalsak a ni tawh lo a ni, an ti. Islamabad High Court pawhin hunbi mumal taka a doctor hmuh phalsak turin ti mah se, hei hi an zawm lo niin an tarlang. Court thupek bawhchhiat a nih bakah, a dikna chanvo neih pawh nasa taka palzut sak a ni, tiin PTI chuan an thuchhuahah an tarlang.