Khawvel Lawrkhawm

2018 inthlanah Bilawal Bhutto-a’n chuh a tum

Pakistan Prime Minister hlui Benazir Bhutto-i fapa, kum 28 mi Bilawal Bhutto chuan an ram inthlanpui neih hunah chuh a tum tih a sawi.

Benazir Bhutto leh Asif Ali Zarari-te fapa neihchhun, Pakistan Peopleís Party (PPP) chairman Bilawal Bhutto Zardari chuan kum 2018 inthlanpuiah a nu bial hlui, Lakarna-ah chuhin an ram prime minister nih a tum thu a sawi.

Kar kalta Inrinni-a Lahore-a Foundation Day lawmnaah he thu hi sawiin, an ram PM Nawaz Sharif chu ro rel thiam lohah a puh a, PPP-in sorkarna a siam hun chu a thleng thuai dawn a ni, a ti.

Trump-a thlawptuten vote chhiar that tum duh lo

US President thlanna neih zawh taka Green Party candidate Jill Stein-i chuan Michigan, Pennsylvania leh Wisconsin state-a vote tla-te chhiar ṭhat a phut a, mahse President-elect Donald Trump-a thlawptute chuan court hnenah vote chhiar ṭhat dilna hi dang turin an phut thung.

Heng state pathum-ah hian Trump hian Democratic opponent Hillary Clinton-i chu a hneh hram a ni. Jill Stein-i hi inthlan neih zawh takah khan popular vote 1% pawh a hmu pha lo a, mahse Clinton-i dinhmun siamṭhat tuma beiin vote chhiar ṭhat hi a phut a, hemi atan hian sum pawh tam tham tak a tuak tawh a ni. A hmalakna hi Clinton-i campaign pawhin a thlawp a ni. Inthlan result tihchhuah hnuhnung berah chuan Clinton-i hian mipui vote, popular vote-ah maktaduai 2.5 chuangin a chak a ni.

Party naa kangmei chhuakah mi 40 an thi

US-a San Francisco bula party neihnaa kangmei chhuak vangin mi 40 an thi.

Oakland Fire Chief Teresa Deloach Reed chuan Oakland Ghostship tia sawi, warehouse chhawng hnihnaa party neihnaah hian mi 50-100 vel an tel niin a sawi. Kangmei chhuah chhan hi hriat chian a la ni lo. Building-ah hian smoke detector pawh dah a ni lo niin a sawi a, a in sak dan hi a rem loh avangin a chhunga awmte tan pawh tlanchhuah a harsat a, hei vang hian thi pawh an tam phah niin a sawi.