Thailand lal-in Privy Council chairman tur ruat

Thailand lal thar, King Maha Vajiralongkorn chuan lal atana lakluh a nih hma a, an lal aiawh hna lo chelh lailawktu Prem Tinsulanonda chu Privy Council chairman atan a ruat a, hei hi lal atana lakluh anih hnuah thutlukna pawimawh a siam hmasak ber a ni.

October 13-a King Bhumibol Adulyadej a thih hnu khan amah thlaktu tur, a fapa hian hun pe rih tura a ngen avangin lal nei loin hun eng emaw chen an awm a ni. Mahse Parliament chuan hun eng emaw chen an sawiho hnuah, kar kalta Ningani khan Vajiralongkorn hi an lal turin an sawm a, ani hian lo pawm≠in lal atan lakluh a ni ta a ni. Mahse lallukhum erawh chu a pa sun hun a ral hun, nakkum lamah khum tir a ni chauh ang.

Kum 96 mi, Prem Tinsulanonda hi Thailand-a politics lama tawnhriat nei ṭha ber zinga mi leh midangte hneh theih tak a ni. Prime Minister hna pawh lo chelh tawhin kum 1988 khan a bang. King official advisor, member 19 awma Privy Council hi kum 1998 aṭang khan a lo ho tawh a ni.

Thailand ramah hian an lal chhungkaw chanchin sawi darh leh sawisel khapna dan khauh tak hman a ni. Lal thar lakluh a nih hnuah Facebook page-a King Maha Vajiralongkorn-a chanchin lo share-tu, activist Jatupat Boonpattararaksa chu man a ni. Jatupat hian BBC Thai-in King Vajiralongkorn-a chanchin a tihchhuah chu Facebook page-ah a lo share a, thubuai siamsak nghal niin thiam loh chantir a nih chuan kum 15 thleng lung in tantir theih a ni ang.