New Zealand PM John Key a bang dawn

New Zealand Prime Minister John Key chuan PM a nihna aṭanga a ban tur thu sawiin, December 12 hian banna lehkha a thehlut dawn tih a sawi.

Kum riat zet New Zealand PM dinhmun lo chelh tawh, John Key chuan chhungkaw thil vanga bang tur a nih thu a sawi a, bang tur hian a nupuiin a ngen niin chanchinbu lam chuan an tarlang.

Key hian press conference a neihah ban a tum thu hi a puang a, a hnaah chuan a chhungte lak aṭang pawha inpek pumhlum a ngai tih a sawi. Bang tura thutlukna a siam chu atana thutlukna siam harsa ber a ni tiin, eng anga awm zui zel nge a tum dawn tih pawh a la sawi thei lo tih a sawi bawk. A ban chhan chu chhungkaw thil vang a ni tih sawiin, ìZan tam tak chu ka nupui Bronagh chuan amaha hun hman a ngai fo a, a tana hun pawimawh takahte pawh ka telpui thei lo fo. Ka fanu Stephie leh ka fapa Max pawh an puitling chho ve tawh a, mahse an pa ber hna avangin an nunah inrawlh an tam lutuk a niî a ti.

Merrill Lynch-a foreign exchange leader ni ṭhin, Key hian kum 2008 khan an rama kum riat zet ro rel tawh, Labour Party rorelna chu titawpin, prime minister Helen Clark-i chu a thlak a ni. An party, National Party chu inthlanpuiah term thum a chakpui tawh a, nakkum 2017-a inthlanpui neih turah chuh a tum loh thu a lo sawi tawh a ni.

John Key chuan nakkum November thlaa inthlanpui neih hunah an party chuan hnehna a chan leh ngei tur thu a sawi bawk.