Duterte-a vice president a bang

Philippines Vice President Leni Robredo-i chuan Pathianni khan President Rodrigo Duterte-a cabinet aṭanga a ban thu a puang.

Housing and Urban Development Coordinating Council (HUDCC) hotu ni mek, Robredo-i chuan banna chhan hrang hrang a awm a, a bul ber chu President-in December 5 aṭanga cabinet meeting reng renga tel tawh lo tura a tih vang niin a sawi. ìCabinet meeting-a ka tel loh chuan ka hna ka thawk thei dawn lo a ni. Hei vang hian banna hi ka thehlut ta a niî, a ti.

Leni Robredo-i hi eptu party, Liberal Party member a ni. President Duterte nen chuan kawng hrang hrangah an ngaihdan leh duhdan a in ang lo hle tih a sawi. Robredo-i hian Duterte-a kaihhruai sorkarin President hlui Fernidand Marcos-a phum ṭhatna tur phalna a pek te, sorkar hriatpuia mi tihhlum te, thi tura hremna pekna dan tihnun leh te, pawikhawihna thubuai siamsak theih chin kum a tihhiam te chu a dodal a ni.

Vice President aṭangin bang mah se, Phillipines sorkarin an ram mipuite ṭhatna tura a hma laknate chu a thlawp chhunzawm zel tur thu a sawi a, an ram tan theihtawp chhuah zel a tum tih a sawi.