Brazil-ah anti-corruption bill duh loten kawng zawh

Brazil sorkarin anti-corruption bill a siamṭhat tum dan chu duh loin Pathianni khan mi tam takin an rama khawpui lian hrang hrangah kawng an zawh.

Kar kalta Thawhlehni khan Congress lower house chuan anti-corruption bill siamṭhat chu a pass a, mahse Senate in a la pawmpui leh phawt a ngai ang.

Nawrh huaihawtte chuan bill siamṭhat tum hian an rama eirukna lian tak thleng chhui mekna a tibuai thei dawn niin an sawi. Eiruknaa inhnamhnawiha puha chhui mek, politician-te chuan anti-corruption bill chu tihnep tumin an ruahman niin an sawi. Hetihlai hian bill siamṭhat turah hian judge leh prosecutor zinga an thuneihna hmang dik lote hremna na tak pekna tur telh a ni thung.

Kawng zawhte chuan eirukna lian tak thleng, Operation Car Wash chhui mektu prosecutoru Sergio Moro leh a team te an thlawpna thuziakte an keng. Brazil sorkar hnuaia oil company lian, Petrobas-a eirukna lian tak thleng chhuin, Operation Car Wash hi kum 2014 aṭang khan neih ṭan a ni a, prosecutor-te chuan dik lo taka thiltihnaah Brazil-a construction firm lian tak takte an inrawlh thu leh, politician, sorkar hnathawk leh Petrobas-a hotuten contract pekchhuahna tura thamna sum an dawn thute an lo sawi tawh a ni. Petrobas-a eiruk lian tak thleng vanga sum a hloh zat hi dollar tluklehding≠awn 1.8 hu a tling a ni.