Khawvel lawrkhawm

Indonesia-ah magnitude 6.4-a nain lir a nghing

Indonesia-a East Nusa Tenggara-ah niminzing khan magnitude 6.4-a nain lir a nghing a, mahse thil tihchhiat liantham a neih hriat a ni lo.

Lir nghin hun hi zing lam dar 8.13 niin, Flores Timur province k hawchhak lam km 120 km-a hla, tuipui hnuai km 524-a thuk aṭanga nghing ṭan a ni. Lirnghing vang hian tsunami a thlen pawh a hlauhthawmawm lo nia sawi a ni bawk.

Karachi-a hotel kangah mi 11 thi

Pakistan-a Karachi khawpuia Regent Plaza hotel-ah nimin zing khan kangmei a chhuak a, mi 11 an thi a, mi dang 30 in hliam an tuar.

Kangmei hi chhawng ruka sang, hotel chhawng hnuai ber choka aṭangin a chhuak a, in chhawng dangte hi rang takin a man kai a ni. Kangṭhelh motor pathum hmangin hotel kang hi ṭhelh a ni a, darkar thum hnu velah an ṭhelh mit thei a ni. Kangmei chhuak vanga thi zingah hian doctor pahnih leh hmeichhe pali an tel. Hliam tuar zinga a tam zawk hi in chhawng chung tukverh aṭanga zuang chhuakte an ni a, tam tak chu meikhu an hip luh hnem avangin enkawl ngaiin an awm bawk.

Sudan-ah South Sudan raltlan 263,000 awm tawh

United Nations High Commissioner for Refugees (UNCHR) chuan South Sudan tualchhung buaina thleng avangin kumin October thla thleng khan Sudan ramah, South Sudan refugee mi 263,000 an awm tawh niin a sawi.

UN refugee agency chuan kum 2013, December thla aṭang khan Sudan ramah South Sudan raltlan hi an lut a, an ram chhung dinhmunin ṭhat lam a pan theih loh avangin raltlan hi an punbelh zel a ni, a ti. South Sudan refugee tam zawk hi Sudan-a White Nile, East Darfur, West Kordofan leh Khartoum state-a camp hrang hrangah dah an ni. March 17 khan Sudan sorkar chuan an rama South Sudan mi lutte chu ramdang mi anga enkawl a lo rel tawh a ni.