Bangladesh PM hluiin an ram inthlan neih tur sawisel

Bangladesh prime minister aṭanga paihthlak, India rama tlanchhe mek Sheikh Hasina chuan an ram inthlanpui nei tura an party chuh thei loa siam a ni chu a dem thu, a thusawi record tihchhuahah a tarlang.

Hasina hi kum 2024-a a kaihhruai sorkar policy avanga lungawi lo a, zirlaite kaihhruaia nawrh huaihawtte security force te a beih leh tir a, mi tam tak an thih avangin Bangladesh-a International Crimes Tribunal (ICT) chuan thi turin a chungthu a lo relsak tawh a ni. Hetih lai hian Hasina hi kum 2024 August thlaa India rama a tlanchhia chu tun thlengin a la awm zui zel a ni.

Chief adviser Mohammed Yunus kaihhruai Bangladesh sorkar lailawk chuan an ram inthlanpi neih hun tura tan February 12 a ruat a, hei hi Hasina paihthlak a nih hnua inthlan an neihna hmasa ber tur a ni. Kar liam ta aṭang khan inthlan campaign pawh neih a ni tawh.

Nikum December thla khan Bangladesh sorkar lailawk chuan Hasina party, Awami League chu party registration leh activity-te tihtawp sak a nih vangin, an ram inthlanah a chuh ve theih loh tur thu a tarlang. Hasina paihthlak a nih hnua, Yunus kaihhruai sorkar lailawk chuan Awami League political party registration chu a lo tihtawp sak tawh a ni.

Hasina chuan an ram inthlanpui neih turah, an party chu chuh phalsak tura a phut thu a awi. Inthlan dik leh felfai tak an nei dawn a nih chuan Awami League an tel a ngai a ni tiin, mipuiten an sorkarna siam tura an vote lo a nih chuan an pawm thlap tur thu a tarlang. Hasina audio message hi oreign Correspondents’ Club of South Asia in press conference an neihah play a ni a, hei hi India rama a tlanchhiat hnua medi platform hmaa a thusawi tihchhuah hmasak ber a ni bawk.