Israel-in Rafah crossing a hawng

Israel chuan nimin khan Gaza Strip leh Egypt inkalpawhna, Rafah crossing a hawng a, mahse, ramri kaltlanga mipui chetvel danah khuahkhirhna erawh siam a la ni.

Israel chuan Gaza Strip-a inkahhai an puanna hnuah, Hamas mi hrente, nung dama awm leh thi tawhte ruang pek kir vek an nih hunah Rafah crossing hi a hawn tur thu a lo sawi tawh a ni. Hamas hian an mi hren, nungdama awmte an chhuah hnuah, thi tawh ruang pawh hmuh kim ni tawhin Israel kuta hlan an ni tawh bawk a ni.

Rafah crossing hi Gaza Strip-a chhawmdawlna thawn luh a nih theihna kawng pawimawh tak a ni. Mahse, kum 2024 May thla aṭang khan Israel sipaite chuan helai hmun hi thununin an khar a, kum 2025 kumtir lam khan rei lote an hawng a, a hnuah khar chhunzawm a ni leh a ni. Palestinian territory-a inrelbawlna kalpui dan enfiahtu, Israel defence ministry hnuaia mi, COGAT chuan nimin khan Rafah crossing hawn a nih thu hi sawiin, Egypt leh Gaza Strip aṭanga kal tawn phal sak ve ve an ni a, mahse, bithliah chin erawh siam a nih thu a tarlang. Mi eng zat chin nge kal phalsak an ni tih erawh a sawilang lo.

Israel sipaite hian Gaza STrip hun zahve aia tam zawk an la thunun a, a bak chu Hamas thununna hnuaiah a la awm. US ruahmannaa inkahhai puan chu a thawh hnihna kalpui a ni. Hamas chuan an mi mante leh thi tawhte ruang pawh Israel hnenah hlan kim an ni tawh avangin, Rafah crossing pawh a pangngai anga hawng tawh turin Israel an phut a ni.