Epstein file tlangzarhin nghawng a nei lian

American financer, human trafficker leh sex trafficker mi tam tak pawngsualtua puh, Jeffrey Edward Epstein chanchin chhuina file chu US Department of Justice (DOJ) in a tlangzarh a, file tlangzarh hian US chauh ni lo, ram dangah pawh nghawng a nei lian hle. File-ah hian mi lar leh hausate tam tak bakah politician eng emaw zat hming a lang a, an buaipui tlang hle.

Epstein file hi kar liam ta Zirtawpni khan DOJ chuan tlangzarhin, a phek hi maktaduai thum a ni a, thlalak 180,000 leh video 2,000 a awm. Ṭum khata document a tihchhuah tam ber a ni.

File-ah hian Jeffrey Epstein-a jail-a a tan lai leh a thih thleng report chipchiar pawh dah a ni. Mi pawimawh tak takte nena email an inthawn ho pawh dah a ni bawk. Email leh document tam zawk hi kum 10 chuang liam taa mite an ni.

Epstein hi kum 2008 khan hmeichhe naupang kum 14 mi mipat hmeichhiatna hmanpui a tum chungchangah thiam loh chantir a ni a, a hnuah sex trafficking case tam takah thubuai siamsak ni zuiin, kum 2019 August thla khan a tanna jail-ah a thi a ni.