Pakistan-a firfiak leh sipaite inbeihnaah mi 100 chuang thi

Pakistan rama Balochinstan province-a security force leh firfiakte inbeihnaah sipai 15 leh firifak 92 an thi tih Army chuan nimin khan a sawi.

Kar liam ta Inrinni khan Baloch group firfiakte chuan hmun hrang hrangah pawikhawihna an thlen a, civil mite an beih tel bakah tan-in, police station leh paramilitary hmunte an bei. An pawikhawihna thlenah hian civil mi 18 an tih bakah, security mi leh sa 15 an thi tel bawk. Hemi hnu hian security force-te chuan firfiakte lakah beihpui an thlak ve nghal a, firfiak 92 an that tih an tarlang. Beihpui thlak hna hi chhunzawm zel a la nih thu Army chuan an sawi bawk.

Pakistan interior minister Mohsin Naqvi chuan an rama pawikhawihna hrang hrang thlentute hi India in a thlawp niin a sawi. A thusawi chungchang hi India chuan a la chhang let lo.

Balochistan-a pawikhawihna thlentu hi dan pawna hnawl, Baloch Liberation Army (BLA) chuan an tih niin an chhal. Video pawh tichhuakin, an pawikhawihna thlenna hmuna an pawl member hmeichhiate chetla laite pawh an tilang tel a ni. BLA hian police station leh paramilitary hmunte an beih bakah, bank an rawk a, police motor eng emaw zat an hal bawk. Rel kawng an tihchhiat bawk avangin, Inrini k han Balochistan aṭanga an ram chhung hmun danga rel service chu tihtawp lailawk a ni.

Sahid Rind, Balochistan sorkarw thupuangtu chuan pawikhawihna thlen tumna hmun tam tak chu an lo dang thei niin a sawi. Province chief minister Sarfraz Bugti chuan secuirty force-te chuan firfiakte chu an umzui zel tih sawiin, nikum chhungin firfiak 700 vel chu security force-ten an that tih a tarlang.