Housing Secretary atan African-American Ben Carson ruat

US President-elect Donald Trump chuan Housing and Urban development secretary atan African-American Ben Carson a ruat.

Ben Carson hi President thlan hmaa Repubican Party candidate inchuhnaah pawh alo tel tawh a, primary election neih lai khan hun rei vak lo chu hma pawh alo hruai tawh a ni. Neurosurgeon a ni a, Trump-a team-a African-American ruat hmasak ber a ni.

Donald Trump ang bawkin Carson hian sorkar-ah nihna pawimawh leh tawnhriat a la nei lo a, amah ngei pawhin Trump-a hian sorkar inrelbawlna lamah tawnhriat engmah a la neih loh avangin a team-a tel pawh a chak loh thu a lo sawi tawh. Mahse housing secretary atana ruatna chu a pawm thu sawiin, Carson chuan khawtlang inrelbawlna tichak a, a mamawhte tana puihna pe thei tura a thawh theih ngei a inrin thu a sawi.

Kum 65-a upa, Carson hi mi rethei chhungkaw
aṭanga seilian a ni a, a nu hian ziak leh chhiar pawh a thiam lo. Kum 33 a nihin John Hopkins University-a pediatric neurosurgery-ah director a ni a, kum 1987 khan phir, an lu-a inzawmte chu a vawikhatna atan hlawhtling takin a lo zai tawh a, khawvel hriat pawh a hlawh phah hle. Kum 2013 khan a hna aṭang hian a chawl a ni.