Khawvel Lawrkhawm
France PM-in President inthlanah chuh tum
France Prime Minister Manuel Valls chuan nakkuma France president thlanna neih turah Socialist Party hminga chuh a tum tih a sawi a, campaign lama insawr≠bing turin sorkara a nihna te bansan a tum thu a sawi.
Mipui ngaihdan lakah Socialist ticket-a ding turin Valls hi an mi duh ber ni mah se, inthlanah hian a tlin an rin lo thung. Kum 54 mi, Valls chuan President thlanah an party lam chuan chance an nei lo niin sawi mah se, engmah hriat lawk a ni lo tih a sawi a, hnehna chanpui ngei a tum tih a sawi.
President ṭanglai, Francois Hollande-aín kum 2017 President thlannaah chuh zui a tum loh thu a sawi avangin Socialist Party candidate tur hian Valls tan hian kawng a inhawng dawn nia ngaih a ni. Party candidate chuh tum hi mi pariat an awm dawn a, an zingah hian economy minister hlui Arnaud Montebourg nen an inbitum ber tura rin a ni.
SKorea firm lian hotute thu zawtfiah
South Korea-a firm lian, SK Group chairman Chey Tae-Won, Samsung Group rochungtu tur Lee Jae-Yong leh Lotte Group Chairman Shin Dong-Bin-te chu eiruknaa inhnamhnawiha puh an nih chungchanga National Assembly-ah roreltuten thu an zawtfiah.
Samsung, Hyundai Motor leh firm dang parukte chuan sorkar lak aṭanga duhsakna an dawn theih na atan Choi Soon-sil-i enkawl foundation tan sum tam tak an pe nia sawi a ni. Choi-i hi President Park Geun-hye-i
ṭhianṭha tak a ni a, hei vang hian he thilah hian President pawh hian inhnamhnawihna a nei ve niin prosecutor te chuan an puh.
Company lian hotute hi Parliament-a party hrang hrang awmna committee chuan thu an zawhfiah a ni. Hemi hma hian company office te pawh dap a lo ni tawh bawk.
IS-in an pawl thupuangtu thar tur ruat
Islamic State (IS) firfiak pawl chuan an pawl thupuangtu, spokeman thar tur an ruat.
Thawhṭanni khan IS hian online-ah audio message tichhuakin, an pawl thupuangtu thar atan Abi al-Hassan al-Muhajer ruat a nih thu an puang. IS thupuangtu ni ṭhin, Abu Mohammad al-Adani chu August 30 khan Syria rama US sipaite beihpui thlaknaah a thi a ni.