Khawvel Lawrkhawm
Myanmar atangin Rohingya 21,000 tlanchhe tawh
Myanmar kawthlang lam, Rakhine state-a inbeihna thleng thar leh avangin, tun hnaiah Bangladesh ramah Rohingya 21,000 vel an tlanchhe tawh.
Bangladesh chuan October thla tir lama Rakhine state-a Myanmar sipaiten beihpui an thlak hnuah, an ramah raltlan lut an tam hle tih a sawi. Hei vang hian Myanmar nena an inrina pawh uluk zawka ven a nih thu International Organisation of Migration office hotu, Sanjukta Sanhany chuan a sawi. Raltlan lut zinga a tam zawk hi refugee camp leh thingtlang khaw hrang hrangahte an khawsa mek a ni.
UN staff-te thlah turin Vienna-ah Ban Ki Moon a zin
UN Secretary-General Ban Ki-moon chu Austria khawpui, Vienna-ah UN staff-te thlahna hun hmang turin a zin. Ban Ki-moon hi UN hotu hna term hnih a chelh hnuah, kumin December 31 hian a term a tawp dawn a, January 1, 2017
aṭangin Secretary-General thar, Antonio Guterres-aín a thlak tawh dawn a ni.
UN thupuangtu chuan Ban hian Austria-a UN staff-te thlahna hun a hman bakah, Austria thuneitute pawh an hnathawhna kawngah theihtawpa an puih avangin lawmthu a hrilh . Tualchhung mi leh refugee-te hna an thawh hona, Habibi & Hawara Restaurant pawh a tlawh bawk. Naktuk hian New York lam apan dawn a, Anti-Corruption Award Ceremony-ah thu a sawi ang. He hunah hian Qatar lal, Sheikh Tamim bin Hamad Al-Thani pawh a tel dawn a ni.
Saudi court-in enthlatua puh mi 15 thi turin hrem
Saudi Arabia-a Specialised Criminal Court chuan Iran tana enthlak hna thawka puh, mi 15-te chu thi tura hremna a pe. Mi dang 15-te chu thla ruk aṭanga kum 25 thleng tang turin a hrem bawk a, mi pahnih erawh chu thiam chantir an ni thung.
Kum 2013 khan Iran ram tana enthlak hna thawka puh mi 30 chu man an ni a, February thla khan an chungthu ngaihtuah a ni. An zingah hian university professor, paediatrician leh banker-te an tel. Court-in hremna a pekte hian an appeal thei dawn a, thi tura hremna pekte hi an lalin a nemnghet a ngai bawk ang. Iran Foreign Ministry thupuangtu Bahram Qasemi chuan Saudi Arabia-ah Iran mi enthlatu an awm lo tih a sawi a, enthlatua an puhnate chu thu belhchian dawl lo a ni, a ti.