CDU hruaitu atan Merkel-i thlang nawn

Germany Chancellor Angela Merkel-i chu an party, Christian Democratic Union (CDU) hotu atan thlan nawn leh a ni.

Thawhlehni-a party hruaitu thlanah hian palai zinga 89.5% chuan hruaitu ni chhunzawm zel turin an duh. Kum hnih liamtaa party hruaitu thlanah khan Merkel-i hian vot 96.7% a hmu pha.

Tun ṭum party inthlan hi Merkel-in vote a hmuh hniam ṭum hnihna a ni a, kum 2004 inthlan kha a hmuh hniam ber ṭum niin party aiawh 88.4% ten hruaitu atan an duh a ni.

Nikuma an rama pemlut mi maktaduai khat tana kawng hawnsak tura thutlukna a siam avangin Merkel-i hian thlawptu tam tak a hloh phah nia sawi a ni. Nikum chhung khan Germany-ah hian inhumhimna zawnga lut mi 890,000 vel an awm. Heng zinga a tam zawk hi Merkel-iín Hungary-a tangkhang mi tam tak an rama pemluh a phalsak hnua lut an ni.

Merkel-i hian an rama inhumhimna duh lutte lak luh belh zel a duh laiin, sorkar erawh chuan an ram a luh tumte tana dan khauh zawk siam turin a nawr a, tualchhung buaina awm lohna ram aṭanga luh tumte lakah khuahkhirhna siam a rawt a ni.