Trump-a’n Air Force One Boeing order sut a duh

US President-elect Donald Trump chuan America president chuanna tur bik, Air Force One Boeing thar siam tura order pek tawh chu cancel a duh thu a sawi.

Hemi chungchang hi a twitter-ah tarlangin, Trump chuan, ìBoeing chuan president hman tur hian 747 Air Force One thar a siam mek a, mahse a senso tur hi dollar tluklehdingawn li chuang zet a ni dawn a, a to uchuak lutuk a ni. He thupek hi sorkar hian cancel leh nghal rawh seî, a ti.

US sorkar hian Boeing hi thlawhtheihna thar pahnih emaw, a aia tam emaw siam turin contract a siampui a ni.

Air Force One thar order hi kum 2024 aṭanga hman theih tura ruahman a ni. Trump pawh hian US President term hnihna a hmang thei a nih loh chuan thlawhtheihna thar hi a hmang hman dawn lo a ni. Trump hian a mimal thlawhtheihna, Boeing 757 jet a hmang a, mahse Prsident a nih hun chuan venhimna leh inbiakpawhna hmanrua ṭha tak nena thuam, Air Force One hi a hman a ngai dawn a ni.

Air Force One-ah hian presidential suite, adviser quarters, secret service officer leh press corp-te awmna te siam a ni a, medical suite awmin operation room atan hman nghal a ni a, hetah hian doctor a awm tel reng bawk.

President-elect chuan Japan-a SoftBank-in US-ah dollar tlukleh≠dingawn 50 hu investment tih an remtih thu Thawhlehni khan a sawi bawk a, hemi hmang hian hna thar 50,000 zet siam a ni dawn a ni, a ti. Trump chuan Trump Tower-a SoftBank CEO Masayoshi Son nen meeting an neih hnuah he ruahmanna hi a puang a, Masa chuan Trump chu inthlanah chak lo ni se chuan investment hi an ti dawn lo tih pawh a hrilh niin a sawi.