US-in Rohingya vangin Myanmar sipai hotu pali hrek
United States chuan Myanmar rama Rohingya leh hnam tlem zawkte dikna chanvo palzut sak nia sawi chungchangah Myanmar sipai hotu palite hrekna chu Thawhlehni khan a siam.
US-in hrekna a siam zingah hian Myanmar commander-in-chief Min Aung Hlaing pawh a tel. Thawhlehni vek khan The Hague-a UN court sang berah Myanmar rama Rohingya te beih leh suatna thleng nia sawi chungchang hi ngaihtuah ṭan a ni bawk a, he hunah hian Myanmar State Councellor Aung San Suu Kyi chu Myanmar aiawhte hruaiin a inlan a ni.
Kum 2017-a Myanmar sipaiten Rakhine state-a beihpui an thlak avangin Rohingya Muslim mi nuai sarih chuang chu Bangladesh ramah an tlanchhiat phah a ni. Myanmar sorkar chuan a sipaite thlavang hi hauhin, Rohingya mite bitum leh suat, an dikna chanvote nasa taka palzut sak nia sawi chungchang pawh chhangin, sipaite hian helpawl lakah chauh beihpui an thlak niin a sawi thung.
US-in hrekna a siam hmang hian sipai hotu palite hian US-a an thil neihte an khawih chet theih dawn loh bakah, US mite an thawhpui thei dawn lo bawk. Heng mi palite hi July thla khan US-a an luh khapsak an lo ni tawh bawk.