Philippine VP paihthlak tumin complaint theh lut leh

Philippine vice president Sara Duterte chu nikuma paihthlak a nih theihna atana hma lakna a paltlang hnuah, nimin khan Vice President a nihna aṭanga paihthlak tuma beih leh niin, a lakah complaint theh luh leh a ni.

Sara Duterte hi president hlui, Rodrigo Duterte fanu a ni a, kum 2028-a an ram president thlanna neih turah pawh a beiseiawm pawla ngaih a ni. Nikum khan mipuiten an ring tawk lo nia sawiin, eirukna leh dan loa thiltihnaah inhnamhnawihah rights group activist-te chuan an puh a; mahse, Supreme Court chuan an puhna hi a hnawlsak a ni. Nimina complaint thehlutte hi civil society leh leftist group te niin, nimina an puhna ngai bawkah an puh leh.

Duterte lawyer-te chuan complaint theh luh leh a nih chu mak an ti hran lo tih sawiin, an puhna hrang hrang dik lohzia lantir turin an inbuatsaih tih an sawi. Vice President laka complaint an theh luhah hian sorkar sum dik lo taka hmang, sorkar contract hmuh theihna tura thamna dawng leh president Ferdinand Marcos Jr leh a nupui, House Speaker hlui te thah tuma vauah te puh a ni. An puhnate hi Duterte hian a hma pawhin a lo pha tawh a ni.