Mi chhanchhuak ṭhin nia dawt sawi travel executive 6 man

Nepal ram thuneitute chuan travel and mountain rescue executive paruk, an rama tlang lawn, harsatna tawkte chhanchhuak nia insawi a, international insurance company aṭanga dollar tam tham tak la chhuaktute an man.

Nepal Central Investigation Bureau chuan heng mite chungchang hi chhuiin, kum 2022 leh 2025 inkar khan tlang lawnte an chhanchhuak ṭhin nia sawiin, an chhanchhuahna atan helicopter hman man te, damdawi lam enkawlna man leh hospital report dik lo an siamte chu insurance company-ah hian an theh lut ṭhin a ni, a ti. An dawtsawi hmang hian USD mtd 20 dawn an dawng niin an tarlang a, an vai hian Nepali vek an ni tih a sawi bawk.

Agency chuan company pakhatin mi an chhanchhuah nia an sawi, mi 1,248 zinga 171 chu dawt a ni tih sawiin, hemi hmang hian USD mtd 10 chuang an dawng tih a tarlang. Hei bakah company dangin an chhanchhuah nia an sawi 75 leh 71 chu thu dik lo a ni tih a tarlang bawk a ni.

Kumtinin Nepal-ah hian tlanglawn tur mi tam tak an kal a, tlang lawn tura kal zinga mi eng emaw zat chu an chauh lutuk vang te, tlang sang an thlena an dam loh avang leh natna dang vangtein chhanchhuah ngai an awm ṭhin. Chhanchhuah hna hi a hautak avangin helicopter hman a ngai a, hemi hmang hian Kathmandu damdawi-in panpui an ni ṭhin.