Bangladesh Court-in kum 10 tang turin Sheikh Hasina hrem

Bangladesh-a Dhaka Special Judge Court chuan an ram prime minister aṭanga paihthlak, India rama tlanchhe mek Sheik Hasina chu eiruk thubuai pahnihah thiam loh chantirin, Thawhṭanni khan kum 10 tang turin a hrem.

Kum 79, Hasina hi Prime Minister a nih laiin a thuneihna dik lo taka hmangin, sorkar housing project, Rajuk New Town Project hnuaiah a vahpa, UK Labour MP leh minister hlui, Tulip Siddiq leh a chhungte dang eng emaw zat chu Dhakha khawpui daiah ram a pe a ni.

Judge Robiul Alam chuan case-a inhnamhnawih, Hasina chhungte dang hremna pawh a tichhuak nghal bawk a, kum 5-7 tang tura hrem an ni hlawm. Court-in an chungthu a ngaihtuah lai hian he thubuaia inhnamhnawiha puh, mi 16 zinga pakhat chauh a inlan a ni. Judge chuan thil dik lo taka titute chu court-ah inlan loin khawi hmunah pawh awm mah se, an chungthu ngaihtuah hi tihtawp a nih phah lo tih a sawi.

Hasina party, Awami League chuan hremna pek hi sawiselin, Muhammad Yunus kaihhruai sorkar lailawkin dik lo takin a puh tih an sawi. Hremna pek chu an lo rin lawk a nih thu an tarlang bawk.

A hmain special tribunal chuan Hasina hi kum 2024-a zirlaite huaihawta a kaihhruai sorkar laka lungawi lohna lantirte security force-te a beih let tir chungchangah thi turin a chungthu a lo relsak tawh bawk a ni. A fate pahnih, Sajeeb Wazed Joy leh Saima Wazed Putul te pawh kum nga ve ve tang turin hrem an ni.

Zirlaite kaihhruaia Hasina kaihhruai sorkar laka lungawi lohna lantir a nih vang hian, kum 2024 August 5 khan sorkar paihthlak a ni a, Hasina hi himna zawngin India rama a tlanchhe nghal a, tun thlengin a la khawsa zui a ni.