Wikoff-a'n Israel PM leh IDF hotu hmu dawn

US special envoy, Steve Witkoff chuan nimin khan Israel prime minister Benjamin Netanyahu leh Israel Defence Forces chief of staff, Lt. Gen. Eyal Zamir te nena meeting nei turin Israel a pan.

Zamir hian kar liam ta khan Washington DC-ah American defence official-te hmuin, Iran ram chungchang a lo sawipui tawh bawk. Israel-a meeting an neih turah pawh hian Iran dinhmun chu a sawi ber tura rin a ni.

Israel a tlawh zawhah, Witkoff hian Zirtawpni hian Istanbul-ah Iran foreign minister Abbas Araqchi a hmu leh dawn bawk. Nuclear deal leh thil dang an sawi dun dawn US chuan a tarlang. US president Donald Trump chuan nuclear deal siam tur hian iran hi a nawr reng a, meeting-ah hian an ngaihdante hriat theih a ni dawn a ni. Turkey, Qatar leh Egypt chuan ram pahnih hruaituten meeting an neih theihna tur hian hman an la nia sawi a ni bawk.

Iran media lam pawhin an president Masoud Pezeshkian chaun US nena nuclear deal siam a nih theihna atana inbiakna nei ṭan tur hian thupek a tichhuak niin an tarlang.

Iran sorkar laka lungawi lohna lantir a, nawrh huaihawtte beih leh an ni chungchangah US chuan Iran sorkar chu vauin, nuarte beih leh an nih chuan sipai chakna hmanga beihah a vau a ni. Iran pawhin chhang letin, Trump-a'n an ram beihna tur thupek a tichhuak a nih chuan Israel leh Middle East-a American sipai hmunte an beih ve nghal tur thu an sawi. Israel PM chuan Thawhṭannia an ram Parliament-a thu a sawiah, Iran in a vau chungchangah Israel chu eng dinhmun pawh hmachhawn turin a inpeih thuin a chhang. 'Min beitute chuan an tawrh zawh loh nghawng na tak an hmachhawn dawn a ni," a ti.