Trump impeachment : Democrats-in Trump an puhna pahnih pharh
US House of Representatives-a Democratic party hruaitute chuan Thawhlehni khan Donald Trump paihthlak tuma an hmalaknaah President an puhna article pahnih an pharh. President Trump chu a thuneihna hmang sual leh Congress thuneihna dalah an puh a ni.
House Judiciary Committee Chairman Jerrold Nadler chuan president Trump chuan US Constitution chu dinhmun derthawng taka a dah avangin Democrats lam chuan hma an lak a ngai a ni, a ti. Nadler chuan, "Trump hian dan chunga lengah a inngai a ni. Mi tumah, president ngei pawh dan chunga leng an awm ngai lo tih kan hrechiang tur a ni," a ti.
House Judiciary Committee hian president Trump an puhna hi House of Representative-ah thawn a nih dawn leh dawn loh chungchangah tunkar chhung hian vote an lak rin a ni. House-in he puhna hi a lo pawm a nih chuan Senate lamin President hi ban a nih tur leh tur loh chungchang ngaihtuah a ni dawn em tih a rel ve leh ang. House-ah hian Democrats lam an tam zawk vangin a tlang ngei rin a ni a, mahse Senate hi Republican lam thunun a nih avangin an lo dan rin a ni thung.
White House chuan thuchhuah siamin, president Trump puhna chu thu dik lo leh belhchian dawn lo a nih thu a sawi. Trump chuan an puhnate hi trial phase a thleng a nih chuan Senate-ah chiang takin a sawi dawn a ni, tiin White House Press Secretary Stephanie Grihsam chuan a sawi.