Pakistan thlawhtheihna tlaah mi 48 an thi

Pakistan International Airlinesí (PIA) thlawhtheihna, PK 661 chu Nilaini tlai khan Chitral pana Islamabad pana a thlawh laiin a tla a, thlawhtheihnaa chuang mi 48 zingah damchhuak an awm lo.

Airlines chairman Muhammad Azam Saigol chuan, khualzin phur thlawhtheihna hi Nilaini tlai dar 4.42 khan Khyber-Pakhtunkhwa province-a Havelian bialah tlain a kang zui a, khualzin 42 leh thawktu panga bakah ground engineer pakhat an chuang a ni, a ti. Thlawhtheihna tlakna hmun hi Pakistan khawpui, Islamabad aṭanga km 70 vela hla a ni.

Saigol chuan France siam ATR-42 aircraft chu darkar 500 a thlawh hnuah enfiah zel a nih thu leh, October thla khan enfiah niin A-check certification pawh a paltlang tih a sawi. PIA chairman chuan thlawhtheihna pilot hian dar 4:09 khan flight controller-te biain, khawl lamah harsatna a awm thu a hrilh a ni, a ti. Flight data recorder pawh hmuh a ni tawh a, heta ṭang hian a chetsualna chhan dik tak hriat theih beisei a ni, a ti.

Thlawhtheihna chesuala chuangte ruang zawn hna hi sipaiten an thawk a, ruangte hi a kang nasa hlawm hle niin an sawi. Thi zingah hian nausen pahnih leh ram dang mi pathum an tel.