Khawvel Lawrkhawm

New Zealand PM thar Bill English

New Zealand Finance Minister Bill English chu an ram prime minister thar a ni dawn ta.

Thawhṭanni khan PM nilai, John Key chuan a ban tur thu a lo puang tawh a, amah thlaktu tur inchuhnaah English bakah, Health Miniser Jonathan Coleman leh Police and Corrections minister Judith Collins-te pawh an tel. Mahse English-a khingpuite hi an inhnuhdawh leh tak vek avangin rorellai, National Party-in karleh Thawhṭanni-a meeting an neih hunah kum 54 mi, English hi New Zealand PM thar atan an thlang dawn a, hemi rual hian deputy prime minister pawh thlan nghal a ni ang.

Pope-in information dik lo tihchhuah a dem

Roman Catholic kohhran hotu, Pope Francis chuan media-teín information dik lo an tichhuak ṭhin chu a dem thu sawiin, thu dik lo thehdarh chu media-in chhiatna a thlen theih nasa ber a ni, a ti.

November thlaa US President thlanna neihah khan online media lamah thu dik lo thehdarh a tam hle a, Pope ngei pawh hi a tuartu zingah telin, Republican party candidate Donald Trump-a a thlawp thu te thehdarh a ni. Belgian Catholic weekly Tertio-in a kawmnaah, Pope chuan media miten thu dik lo an thehdarh ṭhin chu a pawi thu sawiin, thu dik tawk lo thehdarh a nih chuan mipuite tan pawh duhthlanna dik tak siam a har ṭhin tih a sawi.

IS firfiak 17,50 Europe-ah tir

Europe ram aṭanga Islamic State (IS) firfiak pawl zawma Syria leh Iraq-a kal zinga mi 1,750 chu Europe ram hrang hranga pawikhawihna thlen tura haw tir an ni tih European Union report chuan a tarlang.

IS-ah hian Europe ram aṭanga zawmtu mi 5,000 vel an awm a, mahse an zinga 15-20% chu indonaah an thi a ni. 50% chu an pawl hmunpuiah an la awm chhunzawm a, 35% vel erawh chu an ram lamah an kir. Kir zinga IS bansana kir an awm bakah, an pawl hminga pawikhawihna thlen tura kir an awm bawk.