Khawvel Lawrkhawm

Poland mipuiten raltlan lakluh duh lo

Poland rama Public Opinion Research Center-in survey a neihah, an ram mipui tam zawk chuan tualchhung indo thlenna ram aṭanga raltlante lakluh an duh lo.

Survey neihah hian mipui 53% chuan raltlan lakluh hi an duh lo a, 43% in lak luh an pawi ti lo a, 4% in ngaihdan an nei lo. November thlaa mipui ngaihdan lakah khan raltlan lakluh duh lo hi 54% niin, lakluh remti hi 40% an ni thung. Poland mipui, raltlan lakluh duhtuzinga 38% chuan raltlante chuan an rama an kir leh theih hma chauha an awm an remti a, 5% chauhin Poland ramah an inbenbel an remti a ni.

IS-in Bahrain-a US base beihah vau

Islamic State (IS) firfiak pawl chuan video thar tichhuakin, Bahrain-a US sipaite awmna hmun chu beihah an vau.

Bahrain-ah hian US Navy 5th Fleet an awm a, British naval base siam mek a ni bawk. US base hi US Defense Secretary chuan tlawh a tum a ni. IS-te video tihchhuahah IS-te chuan an mi leh sate chu US sipai hmun bei tur hian an fuih. Bahrain fighter jet-in IS ho hmun a beih lai thla te, Gulf Air flight clips-te an tilang bawk.

Solomon Islands-ah magnitude 7.7-a nain lir a nghing

Solomon Islands-ah nimin zing khan magnitude 7.7-a nain lir a nghing a, lirnghing hian South Pacific-ah tsunami a thlen mai a hlauhthawnawm avangin warning pawh tihchhuah nghal a ni.

Lirnghing hi zing dar 4.38 ah lei hnuai km 49-a thuk aṭangin a nghing ṭan niin US Geologlical Survey chuan a sawi. A tirah chuan a nat zawng hi magnitude 8.0 nia sawi a ni a, mahse a hnuah 7.7-a na a ni tih sawi a ni leh a ni. Pacific Tsunami Warning Center (PTWC) chuan lirghing hian Solomon Islands, Vanuatu, Papua New Guinea, Nauru, New Caledonia, Tuvalu leh Kosrae tuipuiahte tuifawn na tak a thlen a hlauhthawnawm niin a sawi.