Iraq leh Syria-ah IS fighter 50,000 thah an ni tawh

US kaihhruai ṭangrual ramten Syria leh Iraq-a Islamic State (IS) firfiak pawl laka beihpui an thlak hnuah IS firfiak 50,000 vel an thi tawh niin US military official chuan a sawi.

Kum 2014 kumtawp lam aṭang khan US kaihhruai ramte chuan Iraq leh Syria-ah firfiakte lakah beihpui thlak a ni a, thlawhtheihna leh drone an hmang a ni. Kum 2014 August thla aṭang khan firfiakte hmun hi ṭum 16,000 zet an bei a, heng zinga hmun thuma ṭhena hmun hnih chu Iraq ram a mi a ni. Beihpui thlaknaah hian civil mi 173 an thi tel tawh bawk a ni.

US sipaite hian beihpui an thlak bakah, tualchhunga firfiakte dotu pawlte chu training an pe ṭhin bawk.

Ṭangrual ram thupuangtu, Colonel John Dorrian chuan Iraq-a Mosul leh Syria-a Raqa te chu firfiakte kut aṭanga laklet tumin ngawrh takin beihpui thlak a ni a, firfiakte dinhmun pawh a chau sawt hle niin a sawi. IS hian an sipaite an hloh nasa tawh a, hei vang hian rawlthar naupang te te an chhawr ṭan tih niin a sawi.

Dorrian chuan Mosul khaw beihnaah hian firfiak tam tak thah an ni tawh a, IS hian sipaite beih letna tur thihchilh bomb pawh an nei tlem tawh niin an sawi. Mahse hemi rual hian IS te hi an la hlauhawm reng a ni, a ti.